عهد و ميثاق و جادهء صلح و وفاق دن عدول و انحراف ايدوب . اشعال نائرهء شقاق و هدم بنيان اتفاق قيلوب . سعادت‌لو پادشاه گردون اقتدار ، اظفره اللّه الملك الغفار حضرت لرى كفار خاكسار دوزخ قرار ايله جنگ و پيكار و مجاهده و كارزار اوزره ايكن ممالك محروسه يه دست تعدى يىدراز و بر قاچ گون ولايتى خالى بولمغله كند و هوا كزده پرواز ايتديكز . بيت چو ميدان تهى گردد از نره شير * شغال اندر آيد به بيشه دلير مذكور اولان اكراد بدنهادك مقدمانه مقولهء فساد و شناعتنه باعث اولد قلرى اول جانبه اطاعت و انقياد لرينك نتيجه‌سى نيه منجر اولديغى معلومكز ايكن شمدى گفتار ناهموار لريله عامل اولوب الفتنة نائمة لعن اللّه من ايقظها مضمونندن غافل اولمق اصحاب و ارباب فحوله شين و عار اولديغى ظاهر و هويدا در خصوصا كفار دوزخ قرين دشمن دين مبين و عدوى سيد المرسلين بر بلوك مشركين ايكن هر برينه مستقل ايلچى كوندروب محضا هواى نفس و تسخير بلاد ايچون كفره ايله اتفاق و اتحاد و مسلمين موحدين ايله نفاق و عناد اوزره اولوب خادم حرمين محترمين اولان پادشاه جهان پناهك ممالكى اوزره على الغفلة هجوم و بوقدر قتل نفوسه مرتكب و باعث اولمق آيين اسلام دن خارج و منهى اولديغى خفى دكلدر چونكه جنابكز نقض عهد و ميثاق ايدوب خصومت و عداوتى ارتكاب ايتديكز سعادت لو پادشاه حضرت لرى دخى كما فى الاول برقولن انكروس و آلامان قرالى اولان لعين دوزخ قرينك اوزرينه و برقولن دخى سفاين اژدر مثال ايله دريا يوزينه دو ننماى همايون ايله ارسال بيورد - قلرند نصكره بوادنى قوللرينى دخى عساكر جرار نصرت شعار ايله سزك اوزريكزه تعيين و ارسال بيورديلر بزدخى امداد رب متعال و توفيق ملك ذى الجلال و يمن روحانيت رسول با كمال و همم چاريار گزين و ساير رجال ايله قارص قلعه سنه نزول ايدوب عنان عزيمتى سزك طرفكزه مصروف و معطوف ايتمشز در ايران و توران شاهى اولوب جهانگير و صاحب شمشيرم ديودعوا ايدوب شمدى يه‌دك مملكت و ولايتى خالى بولوب كمسنه مقابله ايتمسكله منم يك ديگر نيست ديوب قادر اولديغكز